Sanad Guuradii Koowaad Ee Jaamacadda Nugaal Oo Maanta La Xusay Si Rasmiyana Loo Furay, Prof Xayd Oo Isna Buugaagtii Kuwareejiyey Jaamacadda Nugaal.

Nov 16, 2005

Xaflada si heersare ah loo agaasimay oo manta lagu qabtay magaalada Laascaanood gaar ahaan hotel Xaanbuuse ayaa lagu xusay sanad guuradii koowaad ee ka soo wareegtay Furitaankii kumeel gaadhka ahaa ee Jaamacadda Nugaal, si rasmiyana loo furay.

Xafladda oo ay ka soo qayb galeen Issimo, ay kamid ahaayeen Garaad Abshir Saalax, Suldaan Siciid Cismaan,Boqor C/laahi , Garaad C/salaam Xasan Maxmed, Garaad Saleebaan Buraale Wasiirka wabarshada Puntland Axmed Siciid Nuur, Xildhibaano uu ka mid ahaa IBraahim Maxmed Guure,xildhibaano ka socday Dawlada Federaalka, madaxda gobolka oo ay horkacayeen Guddoomiyaha gobolka IBraahim Jaamac Daad,Duqa degmada Dr.C/shariid Barkhadle, iyo howlwadeenka Jaamacadda DR.C/raxmaan Xaaji Saalax,Prof Yuusuf Maxmed Xayd, Oday Maxmed Buraale Ismaaciil iyo martisharaf aad u tiro badan. Waxaana ugu horayn halkaasi warbixin ka soo jeediyey Hawlwadeenka jaamacadda Nugaal

Dr. C/raxmaan Xaaji Saalax oo ka xogwaramay sababihii loo aasaasay Jaamacadda Nugaal iyo fikirkan halka uu ka yimi , wuxuuna sheegay in Jaamacadda Nugaal ay fekerkeeda lahaayeen rag aqoon yahan ah oo ka tirsan Jaaliyadda deegaanka u dhalatay, waxaana ay qayb libaax ka qaateen sidii loo hirgalinlahaa , waxa kale oo uu sheegay in ay iyagu ilaa iyo xilligan dhaqaalo ahaan ay jaamacaddu ku tiirsan tahay, Baahida keentay in jaamacadda la sameeyana wax uu sheegay markii laga fakeray ardayga deegaanka u dhashay iyo duruufaha Soomaaliya Maanta ku sugan tahay, marka uu dugsiga sare dhamaystana ay laga maarmaan tahay in uu sii wato waxbarashadiisii ee aanu iska fadhiisan in loo sameeyo jaamacadda isaga oo deegaankisii jooga uu waxbarasho helo, taas oo dhaqaale iyo bohol-yowga ka baajinaysa.

Wuxuuna Dr. C/raxmaan sheegay in Sannadkii aynu ka soo gudubnay ay si tijaaba ah ugu jireen Jaamacadda arday oo isugu jira arday dugsiga sare ee laascaanood ka qalin jabisay iyo kuwo ay waxbarashadu ka kala goday xilligii dawlada dhexe burburtay oo doonay in ay waxbarashadoodii sii wataan, dhamaadkii sanadkana markii imtixaan laga qaadayna waxaa gudubtay oo jamacadda si rasmi ah ugu fadhiisan kara ardayda badankoodii, waxa kale oo sanadkan soo gali doonta arday cusub.

Wuxuuna Dr. C/raxmaan Xaaji Saalax hadalkiisii ku soo gabagabeeyey in dadweynaha deegaanka looga baahan yahay in ay isgarabtaagaan Jaamacadda oo ay dhaqaale iyo aqoonba ku soo biiriyaan , iskuna tashadaan ee aanay mar walba dadka dibada ku tiirsanaan , wuxuuna sheegay in maadaama ay dhismihii jaamacadda Balanqaaday hay’adda Alminhal in ay ku dhisto si tabaruca looga baahan yahay dadaweynaha deegaanka in ay iyaguna kaalinooda buuxiyaan.

Faarax Sugaal maareeyaha shirkada isgaadhsiinta ee somtel oo isaguna ku hadlayey magaca ganacsatada deegaanka ayaa hadal uu halkaasi ka soo jeediyey ku tilmaamay in ilaa iyo xilligan aanay dadweynaha deegaanku arrinta lagu horumarinayo jaamacadda ka qaybqaadan , haday noqon lahaayeen ganacasato iyo bulshaduba, wuxuuna arrintaasi ku tilmaamay mid aan haboonayn, wuxuuna balanqaaday isaga oo ku hadlayey magaca ganacsatada deegaanka in ay hadda wixii ka danbeeya sidii ay dhaqaalo isula garabtaagi lahaayeen jaamacadda bilaabi doonaan.

Xildhibaan Ibraahim Guure oo isaguna ku hadlayey magaca ururada bulshada iyo kan golaha wakiilada ee puntland ayaa isaguna sheegay in manta la soo gaadhay xilligii loo soo jeesan lahaa sidii waxbarashada gobolka garab loo siin lahaa, wuxuuna dhaliilay maamulka dhexe ee puntland oo uu sheegay in aanu gobollada Sool Sanaag iyo Cayna wax la taaban karo aanay u qaban habayaraadeene, wuxuuna ku ammaanay bulshada SSC sida ay u dadaalayaan, wuxuuna mahadnaq u soo eediyey prof xayd sida hagar la’aanta ah e dalkiisa ugu shaqeeyey.

Duqa degmada Laascaanood Dr. C/rashiid Barkhadle ayaa ku tilmaamay Jaamacadda Nugaal farxad isaga u gaar ah maadaama xilli uu hayo guddoomiyennimada degmada Laascaanood si rasmi ah looga furay, wuxuuna maamulka jaamacadda ku booriyey in ay hawshan adag ee ay dhabarka u riteen si hufan uga soo baxaan ardaydana xushaan.

Oday Maxmed Buraale Ismaacil oo isaguna xafladda ka hadlay ayaa sheegay in ardayda xilligani ka nasiib badan yihiin ,waayo, wuxuu yidhi sannadkii 1945kii ayaan dugsiga anigu ka galay magaaladda Shiikh oo aad uga fog deegaankeena , halkaas ayeyna waxbarasho taagnayd, maantana ardayda xilligan gurigiisi ayaa waxbarashada loogu keenayaa, waxaana inala gudboon in aan waxbarshada isgarab taagno.

PROF Yuusuf Maxmed Xayd ayaa intii aanu hadal kooban xafladda ka soo jeedin wax uu soo bandhigay Film ka xogwaramaya marxaladihii ay soo mareen soo ururinta buugaag gaadhaysa sided kun (8000) oo ay isaga iyo qoyskiisu ugu deeqeem jaamacadda ayaa lagu daawaday goobtii xafladu ka dhacaysa, wuxuuna soo bandhigay xilligii uu bilaabay ururinta buugaagtan oo ku sinayd bilowgii sanadka ilaa xiligan uu guddoonsiiyey jaamacadda nugaal buugaagta, wuxuuna hadal kooban oo uu halkaasi ka soo jeediyey ugu mahad naqay qoyskiisa oo qayb libaax ka qaatay sidii ay garab ugu siin lahaayeen Ururinta, Hagaajinta iyo soo dhoofinta , waxa kale oo uu sheegay Prof. Xayd in ay dadka deegaankani nasiib badan yihiin , oo ay had iyo jeer helyaan dad la dhashay oo is garab taagay, laakiin loo baahan yahay in ay waxka faa’iideystaan, dadkuna ay la gudboontay in ay wixii ay wada qaban karaan wada hagaajiyaan, iyada oo aan fikirka lagu kala tageyn. Ugu danbayntii wuxuu mahad balaadhan u soo jeediyey maamulka jaamacadda, saxaafadda, widhwidhonline, radiossc.net, radiolaascanood, iyo T.v E.T.N, Hay’adda NPA, dhamaan dadkii u fududeeyey hawluhuu u socday.

Wuxuuna Prof Xayd Buugtii si rasmiya ugu wareejiyey maamulka jaamacadda oo iyaguna uga mahad celiyey Prof. Xayd sida wanaagsan ee uu u soo dadaalay, xusayna in uu taariikhda soomaaliya xusi doonta guud ahaan gaar ahaana tan deegaanka, waxayna jaamacaddu guddoonsiisay shahaado Sharaf.

Guddoomiyaha gobolka Sool Ibraahim Jaamac Daad ayaa isaguna ku tilmaamay xafladda furitanka Jaamacadda guul weyn oo u soo hoyatay gobolka sool, oo manta la jaan qaadaya gobollada kale ee Soomaaliya , wuxuna ka hadlay guddoomiyaha nabad galyada gobolka oo uu sheegay in ay sugan tahay, wuxuuna sheegay in maamulka gobolku ku dadaalayo sidii nabad galyada loo adkayn lahaa si waxbarashadu u noqota mid xasisha, dadkalena ugu soo dhiiradaan in ay waxbarasho u soo raadsadaan Gobolka Sool, wuxuuna ammaan u soo jeediyey jaaliyada dibadda ee hawlahan ka soo shaqeeyey.

Wasiirka Waxbarashada puntland Axmed Siciid Nuur oo hadal kooban ka soo jeediyey xafladda ayaa waxa uu sheegay ugu horayn in aad ugu faraxsan yahay in uu ka soo qayb galo xafladan furitaanka jaamacadda, wuxuuna sheegay in ay ahayd in uu ka soo qayb galo madaxweyne ku xigeenku hasa yeeshee xaalado la so gudbonaadey awgeed in uu baaqday madaxweyne ku xigeenkuna uu balan qaaday in uu ka qaybqaato sidii loo horumarin lahaa jaamacadda, waxa kale oo uu sheegay in aad u ammaanayo prof xayd oo la odhan karo ayuu yidhi in uu 60% qabtay hawlihii jaamacaddu ku dhaqaaqi lahayd maadaama uu bugaagtii waxna lagu dhigan lahaa waxna laga dhigi lahaa keenay, taas oo ayba yaryihiin jaamacadda Soomaaliya ee nasiibka u hela fursadan oo kale, wuxuuna sheegay in loo baahan yahay bulshada deegaanku in ay ka faa’iideystaa,wuxuuna balan qaaday in ay jaamacadda ka wasaarad ahaan wax la qaban doonaan.

Garaad Abshir Saalax oo magac issimada ku hadlay xafladana soo gabagabeeyey ayaa waxa uu mahad naq balaadhan u soo jeediyey Prof. Xayd oo uu ku ammaanay sida kartida leh ee uu usoo dadaalay dalkiisa iyo dadkiisan manfaca ugu soo jiday, wuxuuna ilaahay uga baryey in uu ka abaal mariyo guushaas weyn ee uu ummaddiisa u soo hooyey.

Laascaanood Puntland Somalia.

By.Asad Caddaani Ibraahim

Website Created by Alfaproduction@yahoo.com

Copyright © 2005 Nugaal University